Қасиеті өзгере ме?

Ағаш сүрегін (древесина) арнайы үгітеді немесе ағаш өңдегенде қалған ағаш үгіндісін (опилка) пайдаланады. Ағаш үгіндісін түрлі қоспа қосып, қайнатып, біртекті масса – целлюлоза алады. Одан қағаз жасайды. Осылай ағаштың өзіне тән қасиеттері өзгеріп, қағазға айналады.

Заттар түрлі үдеріс барысында өзгеріске түседі. Кейбір үдеріс кезінде заттың күйі мен пішіні ғана өзгереді, қасиетін өзгертпейді. Мысалы, темірді балқытып, әртүрлі жаңа бұйым жасауға болады, бірақ темірге тән қасиеттер жойылмайды. Ал кейбір үдеріс кезінде зат өз қасиеттерін жоғалтады немесе өзгереді. Мысалы, темірден жасалған бұйым таттанса бүлінеді, оның темірге тән қасиеттері жойылады. Сондай-ақ заттардың шіруі, жанып, күлге айналуы, жанғанда түтін мен иіс бөлуі де оның басқа затқа айналғанына мысал бола алады.

Ойлан

Сұраққа жауап бер.
Ағаш жапырағы жыл бойы қалай өзгереді? Осындай үдерістер кезінде жаңа зат түзіле ме? Жапырақтың қасиеті өзгере ме?

Өз жауабыңды мәтіндегі ақпаратпен салыстыр.
Ағаш жапырағы жыл мезгіле орай өзгереді. Көктемде ағаш бүршік жарып, жапырақ пайда болады. Күзде күн сәулесінің қызуы азаятындықтан, жапырақтар сарғаяды, жерге түседі. Жерде жатқан жапырақтар қыс бойы қар астында шіриді. Жапырақтың жерге түсіп шіруі басқа заттың түзілуіне мысал бола алады. Шіріген жапырақ топырақты тыңайтып, өсімдіктің жақсы өсуіне көмектеседі. Жапырақ фотосинтез үдерісінде өз бойында қоректік заттар түзеді, оттек бөліп шығарады.

Пікірің мәтіндегі оймен сәйкес келді ме?